مـنـتـدى الاســيـل
مرحبا بك عزيزي الزائر
نرجوا منك قضاء وقت ممتع معنا
و ذلك بالتجسيل معنا


مرحبا بكم في منتدى الاسيل
 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 الصحبة

اذهب الى الأسفل 
كاتب الموضوعرسالة
لونا الجميلة
عضو جديد
عضو جديد
avatar

عدد المساهمات : 40
نقاط التميز : 3268
السٌّمعَة : 14
تاريخ التسجيل : 25/03/2010
احترام قوانين المنتدى : 100/100
اوسمة : العضو المميز
الموقع : في قلب الحياة.

مُساهمةموضوع: الصحبة   الخميس أبريل 01, 2010 5:30 am

[ندعوك للتسجيل في المنتدى أو التعريف بنفسك لمعاينة هذه الصورة]
الصحبة

يالي سألتني علاش كلمة لحباب ماناش نقراوها فلمسيد وش من سبة

علاش عدنا نقراو غير لحساب سمعت بكري كانوا يقراو عالصحبة

راني حاب نعرف محلها من الإعراب المشكل فالفعل ولا الفاعل الي تخبى

ايلا كان الفعل منصوب نرفعو النصاب والله هاذ القرايا ما فهمت فيها حبة

علاش الحبيب اليوم عاد ما ينصاب وكرهنا بعضانا وعلاش يا عجابة

ولا الصحبة حبست فعصر ابن الخطاب ابا بكر وعثمان وعلي والصحابة

علاش عدنا نقراو عالنجوم وعالسحاب بصح ما نقراوش علبنادم كيف يتربى

لله خويا فيصل احكيلي علحباب ما عدناش نقراوها فلمسيد وش من سبة

ايلا قلتلك نعرف نتسمى كذاب على خاطر كاين شحال من سبة وسبة

بصح راح نحاول نردلك جواب وانا هاذ لجواب خديتو من تجربة

كنت انا عايش في وقت شباب ربي سبحانو عطاني حاجة شابة

نعاون الناس في لوقات الصعاب وكان الي يقصدني نقولو مرحبة

في وجههم عمري ما نغلق الباب ولتم بالذات بديت نعرف الصحبة

الناس يحبوني وكثرو لحباب صبح وعشية معاهم في رحبة

كي نجي نحسبهم يتلفلي منين طاحت عليا كامل هاذ لمحبة

كنت وين نروح نلقاهم قراب حتى ساعات وليت غير نتخبى

نقعد وحدي او نغلق الباب وفلت واقيل انا سلطان الغابة

حسيت براسي راني شايد السحاب وخفت لا كان نموت او يبنولي قبة

ونوّلي والي مدفون تحت التراب والناس تدعيني وتستنى الاجابة

كيما راهم يديرو اليوم فلقباب نشاء الله يهديهم بالمناسبة

المهم مادامش ذاك الوقت الشباب وما نعرف كيفاه جاتني واحد الضربة

تنقطع الرزق وتغلقوا لبواب حمدت الله ورضيت بالكاتبة

وبدات الدنيا عليا تصعاب وبدى حتى الوقت يدورهالي غربة

وبداوي جوا يسقسو عليا الصحاب ما راكش تبان واش هاذ الغيبة؟

قلتلهم ماعليش المومن مصاب والدنيا مرة ساهلة ومرات صعيبة

والرزق حاجة محطوطة في كتاب ساعات تبان وساعات تتخبى

كيف ذيك الشمس الي يغطيها السحابة تعاود تبان لما تفوت السحابة

المهم دركا البركة فالصحاب الي كانوا صابوني في لوقات الصعيبة

نروح ليهم و نقصدهم للبابة يوقفوا معايا في هاذ المصيبة

بصح هاذ المرة رام طولوا لغياب ماحوسوش عليا يادرا واش من سبة ؟

ما علي شانا نروح ونسبب لسباب يالوكان نسمع منهم كلمة شابة

ينسوني شويا في هاذ العذاب راني غير وحدي عايش في غربة

الي نروح ليه نقصدو للباب اما ماكاشو ولا يصيبلي سبة

وبديت نشوف بلي كثرو لسباب ولتم عرفت بلي راهو عليا يتخبى

وعرفت بلي كنت غالط فلحساب وبلي ماشي انا سلطان الغابة

ولا بلاك انا ..ودركا راسي شاب ؟ والسبع كي يكبر يدوروا عليه الذيابة

لتما بالذات الي عرفت الصواب وعرفت وقتاش تزيد الصحبة

الصحبة ما تزيدش فالوقت الشباب تزيد في لوقات والضروف الصعبة

صبرت مع الوقت حتى ربي جاب صاحب من جيهة ما كانتش محسوبة

قالي انا صاحب وماشي طلاب ونقسم معاك كلش حبة بحبة

كيما كان الحال تعاوننا عالصواب توكلنا على الله وتعاشرنا بمحبة

تقاسمنا لفراح وتقاسمنا لعذاب او سبحان الله ردلنا الاجابة

رجعلنا الخير وفتحلنا لبواب وعلمنا بزاف من ذيك التجربة

وزادوا ولاو لينا هاذوك لحباب الي كانوا خلاونا في لوقات الصعيبة

قصدونا وعاودنا فتحنالهم الباب وما سمعوا ملعندنا غير الكلمة الشابة

بصح هاذ المرة عدنا نديروا لحساب نمدولهم بصح مانستناوش الاجابة

يا الي سالتني على كلمة لحباب ما نقدر نقولك من غير ربّ

صاحب واحد فالشدة ينصابى ولا ميات صاحب فالشدة يتخبى
cheers cheers cheers
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://nanou.ibda3.org/
Admin
Admin
Admin
avatar

عدد المساهمات : 387
نقاط التميز : 5194
السٌّمعَة : 58
تاريخ التسجيل : 10/02/2010
احترام قوانين المنتدى : 100/100
اوسمة : العضو الاول
العمر : 25
الموقع : في قلب حبيبتي

مُساهمةموضوع: رد: الصحبة   الخميس أبريل 01, 2010 5:32 am

رائعة شكرا لك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://al-aseel.yoo7.com
 
الصحبة
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مـنـتـدى الاســيـل  :: منتديات الدردشة و التعارف :: رسائل و خواطر شعرية....... للاعضاء-
انتقل الى: