الثلث الخيالي

[ندعوك للتسجيل في المنتدى أو التعريف بنفسك لمعاينة هذه الصورة]
الثلث الخالي

قدامي بحر ومورايا بحر لبحر على يميني وعلى شمالي

وقارب يمشي غير بالزهر ما بين المواج يروح ويوّلي

واش نقول ومع من نهدر ليمن نحكي وشكون يسمعلي

الي نشوف فيه نلقاه مدمر وحتى هو خـــــــــايف مثلي

هذا يبكي وهــــذا يتحصّر وهذا يدعـي في ربي ويصّلي

وهذا باقي يشوف فتصاور حصراه ليام لوكــــــان توّلي

وانا ملهيك قــــــاعد نفكر حاجة وحدة بـــرك في بالي

كيفاه رايحة تكون فاللخر ويا درا فعمري شحال بقالي

هـــــاذي مــدة وانا مبحّر فاتوا أيـــام أو فاتوا ليـــالي

وكل ما يلحق ليل وحداخر نقول خلاص راه لحق أجلي

ليمن نحكي ومع من نهدر من غيـرك ربي واش بقالي

راني ندعي وغير نستغفر ونطلب منك بـاش تسمحلي

راني عارف جيتك متأخر خوذني ربي حسـاب عقلي

ياك لبنـــادم حتــى تتطفر باش يتفكرك وليـــــك يولّي

قصدتك ربي فوسط البحر بحر مورايا وبحــــر قبالي

وقارب يمشي غير بالزهر بين لمواج يـــروح ويولّـي

قبل ما نركب كنـــت نفكر وكنت نقــــول...أنا زوالي

قلت في بلادي راني نتنحڤر شحال من حاجة نحاوهالي

قريت وقريــت حتى للّخر ولما كملـــت لقيــت قبالي

إلا المعريفة هي الي تهدر حتى حياتي كرّهـــوهـــالي

عليها الي قررت نهـــاجر نروح للغربة ونجرب حالي

طلبت الفيزا وقعدت ننتظر في كل مرة يرفضـــــوهالي

لتم قررت نقـــــطع البحر الحرڤة... هـــذاك ما بقالي

خلصت عليها عشر حجر أو فالآخر عفســــــوهالي

الموتور كان مخــــــسر حبس بيـــنا في ثلث لخالي

وبقيت مبحّر وسط البحر أنا وحداش من واحـد بحالي

وياك الندامة تجي فاللّخر وندمت كثر كي واحد حكالي

في بلادو واش راه صاير ولّيـــــــت نحمد فربي العالي

عايش فبلاد فيــها الفقر وين يبــــان الفـــــــقر ديالي

عندهم غيرالسلاح يهدر والي ماعندوش سلاح زوالي

زاد مسكين ورالي تصاور فلّي هــــــاذوا كـــانوا أهلي

ما قعدت غير أنايا اللخر وعائلتي كـــــــامل قتلوهالي

وانا قاعد نسمع ومحيّر زاد كمللي بكلـــــــمة قالهالي

قالي لوكان جات الجزاير بلادي نحمـــــــد ربي العالي

وعمري نفكر اني نهجر بهاذ الكلمــــة خدمهـــــــالي

صرت نقول بالله ياجزاير حلمي نعاود ليــــــــك نولّي

نخدم وعلى ذراعي نشمر نصبر ونشــــد فربي العالـــي

ونرضى بالقضاء والقدر والّــــي ربي كتبّهـــــــــالي

محال ينحيهالي وحداخر لوكان يجتامعوا على جـالي

الجن والإنس ويا معشر مايقدروش ينحـــــــوهـالي

حلمي نولّي ليك ياجزاير ومكمل فيــــــك واش بقالي

وننصح كل من حب يهاجر يرد بالــــو يعمـــــل بحالي

ويعشي مبحر وسط البحر ما كان لا حبيـب ولا والي

وإذا مت تمـــوت منتاحر تموت منسي في ثلث لخالي

أو فاللخر نحمد أو نشكر ربي سبحــــانو أنو سمعلي

أو زاد طوّل لي في لعمر باش نمــوت ما بين أهلي

شفت ملبعيد بابـور ظهر بديت نحمـــد فربي العالي

ورحت نشعل الضو لحمر وحسيت كلـــي راه مولّي

جاو سلكونا حراس لبحر ولتم حلفت ما نزيد نولي

مشكوووووووووووووووووووووره على كل القصائب و الله رائعة بانتظار الجديد دائما