[ندعوك للتسجيل في المنتدى أو التعريف بنفسك لمعاينة هذه الصورة]المخدرات
هذه الدنيا لو كان جـــات تتـعـاود مــاذا بـيــــا
نــعاود حياتي ملي بدات حتـى للـدقيقـة هـاذيــــا
نـروح نصلي زوج ركعات نـطلب الله يـعفـو عـلـيــا
أو يـغفرلي كل مـا فـات ونـطلب السماح من والديـــا
عمــــــلتلـهم بـزاف حـاجــات وكـويـتـهــم بـشـحــال مــن كـيــة
بـابـا تـعـذب ويــما بـكـــــات ودعــوتــهـــم راهــي أتـبـع فـيــا
حتـى حيـاتـي كـامــل ولات غـــــيــر عــذاب ومـــــيـزيـريـا
ويـن نحلـق نـلقـاهــا طـفـات دايـمـا بـلــيــة مــوراهــا بــلــيــة
طول النهار هايم وين جـات ونـدخـل للـــدار غــيـر لـعــشـية
نـدخـل غـيـر بـاش نـبـــــات نلـقـــــى يــــما تــسـتــنــا فـيـــا
أتدخـلنـي غـيــر بـالســكات تســكـت فيـــا وتــخـــبـــي عليـا
وتخسر عليا زوج كلمــات آه يــا خســـــارة التــــــــربــيــــة
واش جابت أو واش ربـات واش تــعـبـت ســهـرت علـيــا
رجعـــتـهـا زوج دمعـــــات والله عيب أو خســـارة عليــا
يلعن ديك الساعة بــالـذات ســاعـة وحـــدة لـعــبـت بـــيــّـــا
ما ننساهاش طول لـحيـاة تبقــى ديـما بيـن عيـنيـا
فديك الدقيقة لحكايـة بـدات جـــــاو نـــــاس داروا بـــيـــا
نـدو ونجيبو فـالحكايـات وبــدات الـريـحـة تجـبـد فيـــــا
قالولي مـا جـابت ما آدات ذوق وتـشوف شـحـال خلويـــة
أجبد غيـر وحـدة وفـرات تشـوف كي تـنسـى هـم الدنيــــا
قلـت ما عليش نهار أو فات ما نظنــش بـلي تـحـكـم فــيـــــا
أنا الـــي نحكـم فـالذات وما شـي ذاتـي ألي تـحـكـم فيـا
الجبـدة ولات زوج جبـدات مـن بعـد قـارو من بعد كميــــة
مـن بـعـد ولات إذا والات بـدات بـــشويـة تـكبر الحيــــــة
منـاسبـات من بعـد عادات مـن بعـد زوخ ورجـولـيــــــة
من بعد ولات تمشيلي فالذات ولات هــي الـي تـمّشي فـيـــــا
وين نهـرب نلقـاها جـات حتـى لعـندي تحـوس عـليــــــا
وتـقـابـرني فـالـشـدّات حـتـى نـصيـبـها بـيـن يـديـــــا
تـحـرقـت ولاّت فـتـات تــــلــوّات و تـسـتـنـى فـيــــــــــا
نجبـد وحـدة زوج ثـلات لـــتــــــــم تـتـبـــدّل العـقـليـــــــة
نـولي نـشوف في حاجات عــمـري مـا شـفـتــهــم بعـينيـــــا
حيـاة خيـر مـن هاذ لحياة ودنـيــا خـيــر من هاذ الدنيـــــا
دنيـا وحد وخرا اتـبنـات بـاش تــكـون مـخــدومــة لـيــــــا
ما فيها عـذاب لا مـعانــاة لا تــعـــــب لا مــــســؤولــيــــــة
ويـن مانحـب نـروح نـبات دنــيــــا كــامـــل بــيــــــن يــدّيــا
لحجـر تـردهـم مـخـدات والــتــراب يــوّلـي حنـيـــن علـيـا
نطيح أونرقد وين ما جــات نــــرقـــد ولمـــّا نـحـــل عيـنـيــا
نسمع داخل راسي حـاجـات وكلـّـــــي حــــس يـقــلــق فــيـــا
ويقول لي هذا ليـل وفـات هـــــاذي ليـلـــة فاتــــت خـلويـــة
واليوم ويـن رايـح نـبـات ليلة وحدوخـرا راي تستنى فيـا
ولازمـلـي مـخـــدرات لازم قــــــــارو ولا كـــمـــيـــــة
ولا قطـرة ولا حـبـــات ولا غـــبـــرة الــمـــهــم هـــــــي
حـكمـت فيـا ودرك فـرات درك خــلاص اتــطـفــرت فــيــــا
الـعقـدة ولات زوج عقـدات والدنيا راهــــي تــعــقــدت عليــا
يـا نـكملـهـا كيـما بـدات ونــشـــوف فيـهـا تــقــتـل فــيـــا
يا نحبـسهـا كيـمـا جــات يـا تـحبـــسـلـي حــيـاتـي هـــــــي
مـدام لـحقـت للـممـــات إمّـــــا فــــيــــــــها ولاّ فـــيــــــا
جابـلـي ربــي بـاراكـات الي خســرتــو بــزاف عـلـيـــــــا
خسرت وخسرت بزاف حاجات خسرت كل شي بسـبـابـهـا هــــي
خسرت ربـي خسـرت الصلاة خسرت الدين وخسرت الدنيـــــا
خسرت مالي وصـحتي رشات خسرت خاوتي وخسرت والديـا
خسرت ولاد وخـسرت بـنات ولاّو كـامــل يـهــربــو عــــلـــيا
خسرت عمري وضيعت اوقات وزدت خســرت حتى العقلية
وبصـراحـة في ثلت كـلمات ولات معـــنديــش شـخــصـيــة
حاجـة وحـدة بـرك بـقـات حـاجــة وحــدة مــزالـها حـيــة
الـروح مـدام مـزالها فـالذات نـقــــدر نـوقــف عـلى رجـليــا
نـقصـد رب الـمخـلـوقـات نـسـجــدلــو ونديــــر النــيــــة
ومـدام النيـة لربـي صـفات بــلا شــك راو رايح يسمع ليـا
هــو الي يـحـيي لـمـوات سـبـحــانـو نـرفــدلـو يـــديـــا
يـا مـجـيب الـــدعــوات اهدينــي واعفـــو عليـا
وافتـح قـلبـي للـــصـلاة وامسح الدمعة من عين والديا
واعفـيـنـي مـالـمخـدرات وارفــــع عنـــا هـــاذ البـلـيـة
او نـوعـدك كيـما بـــدات انحـبـسـهــا غيـر بـالشـويـــــة
ونعاود نخـلف كـل مـا فـات ونمد لـروحي صفحة نقـيــة
ونخـتـم كـلامـي بـالصلاة والسـلام عـلى خيـر الأنـبيـــا
مـحـمد سيـد المخـلوقــات والحمد الله على الساعة هاذيا
فيـصل كـرشوش كتـب لبيات ولـو لحـكايـة ماصراتليش ليا
لكــن هـذ لـحكايـة صرات لنـاس بـزاف عـزاز عـلـيـــــا
موضوع: المخدرات 
الخميس أبريل 01, 2010 5:37 am
