طريق الحق

[ندعوك للتسجيل في المنتدى أو التعريف بنفسك لمعاينة هذه الصورة]
طريق الحق:

بسم الله... الحي الخالق سبحانو خالق كل شي حساب

والصلاة على الصادق سيدنا محمد الي علّملنا لصواب

لحياة حق، والموت حق كل واحد أجلو مسمي في كتاب

كل واحد تلحق دالتو تلحق الموت وحدة و تختالف لسباب

كل واحد يرجع كيما تنخلق اصلو من تراب ويولّي لتراب

هذا يسبق او لاخر يلحق واحد بواحد نفوتو على الباب

حصرا إذا كنت كافر أو منافق غير الموت يلحق يبدى لعذاب

أما إذا كنت مؤمن او صادق يثبتك عالشهادة وحسن الثواب

تخرج عمرك وتطلع للخالق تتشيع جنازتك بالأهل او لحباب

الناس فالمسجد عليك تتسابق يدعولك الله مالباب للمحراب

كل دعوة تخرج لعندو تلحق ونتايا تبدى تقول يا من صاب

يجوا يوقفولي كامل الخلق يدعولي ويخففوا عليا لعذاب

لتم يرفدوك والموكب ينطالق كأنك عريس في ساعة غياب

يكبروا ويهللوا حتى كي تلحق لقبرك ويحطوك داخل التراب

غير انت وعمالك ولقبر يتنغلق لا اهلك لا مالك حاجة ما تنصاب

وحتى ذيك الناس كامل تتفرق وتطويك كيما يتنطوى لكتاب

وتبقى غير وحدك دايق ومقلق تقول يالوكان نولّي يا من صاب

وربي يزيدلي غير خمس دقايق نكملها بالخير وبالفعل الشباب

لكن للأسف راه قبرك تنغلق دركا ما بقالك من غير لجواب

منكر ونكير او لمساولة تلحق يا سعدك لا ثبتك بجواب صواب

يجوك على رجليك، صلاتك تنطق تقوللهم صلى مالشروق للغياب

كان يصليني كلما وقتي يلحق صلاتك تشفعلك وانت تحت التراب

تقوللهم الصلاة ماعندكم منا حق حوسوا ملهيك بلاك تصيبوا باب

يجوك على راسك، صيامك ينطق يتكلم بلسانك ويكونلهم حجاب

يقوللهم خلوه صيامو كان حق وماشي على الطعام برك والشراب

وانما صام بالجوارح والحلق حوسوا ملهيك بلاك تصيبوا باب

يجوك على يمينك الزكاة تنطق يامنكر وش تسحق يانكير وش حاب

خلوا هاذ العبد فحياتو كان يصدق وينفق ويزكي ويخرّج ملجياب

تقوللهم الزكاة ماعنكم منا حق حوسوا ملهيك بلاك تصيبوا باب

يجوك على شمالك الحج ينطق يقوللهم حجني ومعايا ذاق لعذاب

والا ماعندوش لكن كان يصدّق بلي الحج حق او والله كان حاب

يقوللهم الحج ماعندكم منا حق وشحال تحوسوا ماتلقاو حتى باب

تبقى الشهادة الي تحل وتغلق مفتاح الابواب ومفتاح الحساب

يا سعدو الواحد الي بيها نطق ويا وعدو الي تعمّر فمو بالتراب

لتم يفيقوك ولما تضحى فايق يكلموك بالملاحة وبالكلام الشباب

كيف ذاك لعريس معزز ومدلق يبداو يسألوك ويسهلّك لجواب

الحاجة الاولى يسألوك عالخالق الي خلقنا وخلق آدم من تراب

والحاجة الثانية واش دين الحق تقوللهم الإسلام هو آخر كتاب

يسألوك شكون هو خير الخلق تقوللهم محمد علملنا لصواب

صلى الله عليه النبي الصادق هو حبيب الله واحنا ليه حباب

احنا الي نآمنوا بيه وبأنو حق بلا ما شفناه وما كنا ليه قراب

احنا الي تبعناه في حسن الخلق فالدين والتربية والفعل الشباب

من بعد يبداو يسألوك بالدقايق فعمرك واش درت وكلّش حساب

ويزيدوا يسألوك اذا كنت تعّق ولاّ كنت تبر بالأم او بالأب

ويسألوك كيفاش كنت تنفق الشي الي كان عندك فلجياب

وولادك يا درا ربيتهم عالصدق عالدين والطاعة والخلق الشباب

لتم تجاوبهم وتقوللهم الحق وعلى كل سؤال تجاوبهم صواب

يقولولك الآن راح تشوف الفرق ما بين الرحمة وما بين العذاب

تتنفتحلك باب جهنم وتتنغلق هذا هو مكانك لو ما لقيتش جواب

او مادام انت، تبعت طريق الحق حقك هو الجنة ويفتحولك الباب

غير يفتحوها النور منها يشرق ارقد وانت مهني واستنا لحساب

ماكان لاه تخاف انت خيرك سبق عملت الخير وراح خير منو ينصاب

يوقف قدامك راجل فيك يحدق راجل منور وجهو صافي شباب

يقولك انا فعلك باش ما تتقلق جيت باه نونسك هنا تحت التراب

أما إذا كنت كافر أو منافق ولا مت مشرك ولاّ شارب الشراب

ولاّ شارب السم ولاّ مت معلق ولاّ قاتل روحك لتم يبدى لعذاب

ما تخرجش عمرك حتى تتنخنق وتولي تطلب فلموت يامن صاب

ولتم بعدا تندم على كل ما سبق لكن اتطفرت وتنغلق باب الثواب

لو درت حسابك قبل ما يتنغلق وربي سبحانو غفور تواب

تموت ولتم الناس تبدى تلحق تتعمر دارك بالأهل ولحباب

يبكو شويا عليك وعندهم الحق لازملهم يبكو راه يستناك العذاب

يرفدوك الناس وللمقبرة تلحق يحفرولك حفرة ويغطوك بالتراب

التراب او لحجر عليك يتدفق لقبر يدياق عليك ويتنغلق الباب

أهلك وصحابك والكل يتفرق مالك أو سلطانك حاجة ما تنصاب

تلقى روحك وحدك دايق ومقلق لتم يجوا ملكان يفتحوا عليك الباب

منكر ونكير أو لمساولة تلحق رد بالك برك ما تلقاش جواب

بصح يا ريت تقدر حتى تنطق باش ترد عليهم وتجاوب صواب

منكر ونكير شكون فيهم يشفق مطرقة لو ضرب بيها جبل لراب

يضربك ضربة راسك يتفلق تعيط ويسمعك الي بعدك للحساب

راسك يتحل يزيد يعاود يلصق ومنكر ونكير يعياو يا من صاب

غير اذا عندك كاش خير سبق ولا ذرية صالحة تدعيلك فلغياب

لتم يورولك باه تشوف الفرق ما بين الرحمة وما بين العذاب

يفتحولك الجنة وتعاود تتنغلق هذا هو مكانك لو لقيت لجواب

لكنك انت فالدنيا كنت عاشق وهي الي وصلاتك حتى لهذ الباب

يفتحولك جهنم نارها تحرق وتبقى تتعذب حتى ليوم الحساب

يا ربي ارحمني أنت الخالق وانا المخلوق ما نحمل هاذ لعذاب

ارحمني فالنهار الي فيه نفارق وثبتني عالشهادة وحسن الثواب

ارحم أمتي كامل السابق والاحق اهدينا للخير او للفعل الصواب

كل المسلمين مالمغرب للمشرق الي راهم تحت ولا فوق التراب

وارحم والدينا واجعلهم في طابق الرسل والأنبيا والأهل اولحباب

يا ربي اهدينا الى طريق الحق الى دين الإسلام ونعم الكتاب

الي نزلتو على الأمين الصادق حبيبنا وشفيعنا في يوم الحساب

وفيصل كرشوش اجعلو ينطق بكلمة الحق باش يكون السباب

يتنهدى للخير ويتنهداو الخلق ونولّو للطريق ونتبعوا لكتاب

ويولّي للطريق الفاسد والفاسق وحتى المتعصب يتنهدى للصواب

هذا هو قصدي والي يحب يطبق يقرب من ربي ويقصدو للباب

ربي ما يردش الي فبابو يدقدق انه غفور رحيم وشديد العقاب

شكرا لك لا تحرمينا من ابداعك